مربع 66 الوادي الأخضر ولجنة الأراصي

[الطيب ادريس]

قبل اتفاقية السلام بأيام كان أحد الاخوة نسيب لي يشغل وزير دولة في حكومة الانقاذ مع الأخ مجذوب الخليفة رحمة الله عليه .. كنا نتسامر وكان حديثنا ينحصر في اراضي الخرطوم التي اصبحت من جميع الجهات في قلة أو عدم وجود خطة اسكانية جديدة .. وذكر لي بالحرف الواحد أن هناك استراتجية للحكومة تعمل في نقل العاصمة الي المكان المقترح لمطار الخرطوم شرق الحاج يوسف والذي نقلت فكرته واصبح واقعا غرب أمدرمان
.. لم أكن أتصور أبدا بأن العاصمة الجديدة ستكون الوادي الأخضر وأنا شخصيا وقفت في اجازتي الفائتة علي ترعة السليت ورأيت بأم عيني كيف كانت الاعمدة الكهربائية ممتدة علي مدي البصر شرقا وجنوبا وشمالا ورأيت كيف كانت الأعمدة الكهربائية الضخمة وارد سد مروي تتباهي في الأفق .. وتمنيت في نفسي أن يكون لي حظ في هذه الأرض البيضاء في الليالي المقمرة والمخضرة في أيام الشمس الخرطومية الجديدة ..
عندما حضرت ندوة هيئة الأراضي لم يخالجني أدني شك في الشفافية التي كانوا يتكلمون بها ومدي صدق وحرص الاخوة في وزارة التخطيط وهم يتحدثون حديث الرجل الأمين بأن يعطي كل منّا قطعة أرض هدية واعتبرها هدية للحق والأمانة وأقولها لكم جائتني عدة تلفونات من الخرطوم أنا وغيري تحثنا لشراء اراضي لهم ان أمكن لمعرفتهم التامة لهذه البقعة الخضراء واعتذرت لهم بأن هذه الأراضي لمغتربي مسقط ولمن فاتهم قطار توزيع اراضي المغتربين ..
شكرا للسفارة التي سبقت كل الأحداث في عام 2010 م وهي تدعو لنا لجنة الاراضي لتمنحنا أجمل هدية في الغربة 400 متر مربع في العاصمة الجديدة ( الوادي الأخضر ) وبرغم الفائدة الكبيرة التي ستجنيها السفارة من عائد التوكيلات الا وأننا نتمني من السفارة تسهيل هذه المهمة حتي لا تكون كتلة فوضي كما حدث الان في زحمة التوزيع برغم مثابرة الاخوة ليلا ونهارا في تنظيم التسجيل ..
الأغلبية بلا شك تملك أراضي ومنازل ولكن ( اتكوينا بذلك بالبيع الحر ) وأخذ منا مجهود غربتنا .. ولكن لأول مرّة نعترف بصدق لجنة الاراضي ونشكرهم علي المجهود الجبّار المبذول في تذليل كل الصعاب وخاصة في الأماكن الأخري السكنية والتجارية المحصورة والتي تم فيها اجراء القرعة وكانوا في غاية البهجة والسرور لكون هذه اللجنة الموقرة اختصرت للجميع شقاوة الجري والاجراءات وضياع الزمن واستخراج شهادة البحث .. نكرر الشكر لسعادة السفير لهذه الدعوة وأكيد شكرنا لهذه اللجنة الرزينة الأنيقة ذات القيم والهدف النبيل وشكرا للهدية .
خارج النص :

ولا أسيبها مدني وأجي أسكن حدّاكا

مربع 66 الوادي الأخضر سيضم كل أبناء مسقط وخاصة أبناء الجالية والنّادي السوداني .. وأتمني أن يكون اذا قدر لي السكن في هذا الوطن الجميل العاصمة الجديدة أن نجتمع مرة أخري وسنعلن من الآن مكان النادي وكوادره ..
وسننتقل من الغربة الي الوطن الحبيب ونترك ديارنا في مدني والخرطوم وسنار وغيرها لنجتمع مع هذه الالفة الجميلة .
للذين يحبطون ويقولون أن الوادي الاخضر في البطانة .. نقول لهم كيف يكون مطار الخرطوم المقترح أولا في البطانة .. وليكن في العلم أن شرق النيل اعتبارا من كافوري والحاج يوسف والمربعات والجريفات والوادي الأخضر هي (مظاهر ضهرة البطانة ) ولمعرفة المعني نرجو زيارة بوست ( الغربة سترة حال ) .

[اقبال حجار]

الطيب ود ادريس والله كلامك سمح ..مالك شهيتنا كدي في الوادي الأخضر دة ...ومع انتقال النادي ينتقل المنتدى ايضاً ..والله كلامك حقيقة فمن عاشرناهم هنا في عمان نتمنى أن نجاورهم مستقبلاً كان الله مدَّ في الأيام ...والحمدلله الحجزنا فيها .

[الطيب ادريس]

تسلمي أختي العزيزة اقبال وبالفعل ضّم مربع 66 الوادي الأخضر كل الأصحاب والأسر الصديقة في مسقط وستكون ثورة سكنية في القريب العاجل ان شاء الله كون الكهرباء موجودة ويتبقي الماء فقط ( حديث لجنة الأراضي ) والذي رصدت له وزارة التخطيط مبلغ 325 مليار جنيه سوداني لكل المخطط الجديد في الوادي الأخضر ويشمل كل المربعات بما فيهم المربع الأهم والمعلم البارز مربع ( 66 الوادي الأخضر ) .

[الطيب شيقوق]

طيوبا شكرا ليك واااااااااااااااجد

لكن اقول ليك وحاة الله عيب الوادي الاخضر دي انها بتسكنك مع ناس عاشوا معاك في الغربة الكريهة - يعني بالعديل كدا كلما قمت قادل من الصباح وشايل بشكيرك في كتفك بلاقيك واحد بذكرك الغربة ومراراتها

انا غايتو اكان الله مد في العمر ببني ليكم فيها برج وبقوم ااجروا واجيكم اخر الشهر لزوم الكولكشن بتاع الايجارات وامر عليكم كدي اسلم عليكم سلام عابر بس ومحل رهيفة تنقد

لقيتني كيف يا عمو طيوبا؟

[الطيب ادريس]

والله يا شيقوق اخوي مربع 66 الوادي الاخضر اصبح اخضرا بالفعل بدليل منح لجنة الأراضي مغتربي سلطنة عمان في هذا المربع ( أرض مسجد وأرض للنادي ) أها قضّروا معانا .. غايتو غصبا عنّك تلف عمتك وتقطع الكباري وكل الكباري ستوصلك الينا ابتداء من كبري السروراب وشمبات وبري والممشية وكبري الجريف الحديث وشارع الفاتح من سبتمبر وكل الطرق .. تمسيك معانا وتشبع ضحك وترجع لامدرمانك .. الله يدّي العافية .. ونحن كلنا في نية ترك منازلنا والتجمع مع هذا الألق البديع ولو كنا ( خرافي ) .. مدّ الله في عمر الجميع صحة وعافية ونتلاقي في أحسن اللقاء ...
حلم ولكنه حقيقة وجميل وواقع ان شاء الله في القريب خاصة مع وفرة مواد البناء والطرق الحديثة والسريعة للبناء .. لكن النادي الجديد في مربع 66 الارض الخضراء في قرارة نفسي اخوي حيدر والسني يشموا لجنة النادي ( قدحة ) ..

تخريمة :

مافي واحد يجي يعكننا ... خلونا نحلم !!

[الطيب شيقوق]

لكن النادي الجديد في مربع 66 الارض الخضراء في قرارة نفسي اخوي حيدر والسني يشموا لجنة النادي ( قدحة ) ..

ههههههههههههههههههههههههههههههههههههههها شكيتك على الله يا الضبياني

[السني أبوالعزائم]

المشاركة الأصلية كتبت بواسطة الطيب ادريس

تخريمة :

مافي واحد يجي يعكننا ... خلونا نحلم !!

والله يا الطيب ياخوي،، انا خايف عليك من كسر الجرة،، لكن مالو،، كلنا بنحلم معاك

اسسسه ود شيقوق يقوم يشيل كسر الجرة ويوديها بي هناك

[الطيب شيقوق]

المشاركة الأصلية كتبت بواسطة السني أبوالعزائم

والله يا الطيب ياخوي،، انا خايف عليك من كسر الجرة،، لكن مالو،، كلنا بنحلم معاك

اسسسه ود شيقوق يقوم يشيل كسر الجرة ويوديها بي هناك

عييييييييييييييييييييك يا السنى اوع تكون درست في مناهج كسر الجرة وطه القرشي مريض والجدادة الصغيرة الحمراء؟

[عصام نوح]

معذره القطعت عليكم ونستكم الحلوة دي بس حبيت أطمئن الذين لم يحالفهم الحظ في الحصول على قطعة أرض في وادي الطيب إدريس الأخضر ،، طلبوا أعضاء الوفد من السفارة أن يسجلوا إسم كل من لم يحصل على قطعة وسوف يرسلوا وفد آخر أو يرسلوا أوراق أراضي للسفارة ،، المهم كل من يعرف واحد لم يحصل على قطعة أن يخبره بأن يسجل إسمه بالسفاره وذلك حتى الإسبوع القادم وأنا بنفسي كنت أمس بعد المغرب بالسفاره وسجلت ناس كثيرين ولم يكن الوفد موجود بعدها عرفت أن الوفد بالنادي وعند حضوري للنادي قابلت رئيس الوفد وأخبرته بأننا سجلنا أكثر من 200 واحد وقال لي ما مشكله سجلوا كل من لم يحصل علي أرض ورسلوها لنا وهو وعد بذلك فأرجو من الجميع أن يسجلوا بالسفارة في أقرب وقت ممكن ( علما بأنه تستحق كل أسرة قطعة أرض واحده ، وسمعت السفير يقول إذا إكتشفوا أن واحد وزوجته مسجلين للحصول علي قطعتين يفقدون الفرصتين ) ،، خالص مودتي للجميع ،،، .

[السني أبوالعزائم]

المشاركة الأصلية كتبت بواسطة الطيب شيقوق

عييييييييييييييييييييك يا السنى اوع تكون درست في مناهج كسر الجرة وطه القرشي مريض والجدادة الصغيرة الحمراء؟

طه القرشي شنو وحساب التلميذ بتاع منو يا شيقوق،، يازول انا لي اسه بدقوني في مص الأصبع. ياخي كلامك البتقولو ده نحن قريناه في روضة ماما بتول

اها انتو قريتو (منقو)،،، لكن نحن قرينا زيدان الكسلان

[الطيب ادريس]

جديات العسير قالن لي أحمي رهودنا
عن أسد أشرة وأمنع بوارق فهودنا
قالن لي لو تحفظ مواثيقنا وتراعي عهودنا
تتوسد غدايرنا وتنام في رهودنا
أريل شام شروق شراكي مانشابك
وشم نفسك يفوق مسك العشاري الشابك
عشبة بان قسي المن فريق نقادا
أرضه البان قسي ديسا المهضلم قادا
يا خالق القسي بدلة منام لرقاده
يا خالق الوجود أنا قلبي كاتم سره
وما لقيت من يدرك المعنى وبيهو ابره
قصبة منصح الوادي المخدر دره
قعدت قلبي تطوي وكل ساعة تفرو

كل الود ...

[حيدر امين]

يمكن يخصصوا قطعة ارض فى مربع 66 (سيد) الاسم وفى الفسحة الكبيره الفيها الجامع باسم النادى الاجتماعى للجالية بسلطنة عمان فرع الوادى الاخضر

[samiaebrahim]

شكلها الفرصة ضاعت بالنسبة للمة مع النخبة ننتظر بعد مايدخل التلفريك السودان وتقصر المسافات بعدها نسجل اعمل لينا واسطة يا عصام نوح .

[الطيب ادريس]

الأستاذة سامية .. جمعتك سعيدة وبالتأكيد هناك توأمة بين الوادي الأخضر وأمدرمان .. ومحمد عثمان يمشي مننا ويييين .. الله يحقق المراد ويلم اللّمة .

[الطيب ادريس]

المشاركة الأصلية كتبت بواسطة حيدر امين

يمكن يخصصوا قطعة ارض فى مربع 66 (سيد) الاسم وفى الفسحة الكبيره الفيها الجامع باسم النادى الاجتماعى للجالية بسلطنة عمان فرع الوادى الاخضر

نسيت ما أسألك ياحيدر عن الخدمات الأخري هل هي متوفرة في الوادي واقصد مربع 66 .. المدارس المستوصف الطبي الميادين الرياضية بالاضافة الي المسجد والنادي السوداني .
النادي السوداني عايز مساحة كبيرة عشان المسرح والعاب للاطفال ومحل في الركن البعيد ( نكون عجزنا الوقت داك وبقينا ناس سبحة وكنكان وترمس وبلح ) !!

[الطيب شيقوق]

اخر الانباء ان اراضي 66 الوادي الاخضر ارضها عزاز صالحة لزراعة البطيخ - بس عقاربها زى النمل ولسعة العقرب منها والمقابر

[الطيب ادريس]

قريبي .. انت انفصالي ولا شنو ؟؟
ماتسمع كلام باقان سنار والدندر يتبعن الجنوب ..
أكان صحي في الأجندة الخفية واطاتك أصبحت

الطيب بالله ما تهظّر .. نحن كوّنا لجنة النادي .. وشيخ الحلة والعمدة !!

[حيدر امين]

جونا فى النادى واتكيفوا من اللمه عشان قلنا بدونا فرع بهناك
المستوصف والمدرسة فى الفسحة التانية التالثه الفيها الروضة جنب الحديقة

[samiaebrahim]

الاخ الطيب جمعة مباركة، ولله ده كلام الكضب تعرف أنو الناس لما ترجع للسودان مابنلقي الفاضي لينا غير ناس مسقط ، انشالله الحلم يتحقق وتحقق اللمة المرجوه .

[الطيب شيقوق]

الطيب بالله ما تهظّر .. نحن كوّنا لجنة النادي .. وشيخ الحلة والعمدة !!

وانا ما اديتوني في حقائبكم الخضراوية دي حاجة ؟